Ўзбекистон журналистларини қайта тайёрлаш маркази яқинда талаба ёшлар ва журналистлар учун динлараро бағрикенглик масалалари бўйича давра суҳбати ва мастер-класслар ўтказди. Тадбирда Ўзбекистон Миллий университети, Жаҳон тиллари давлат университети ва Ўзбекистон Бадиий академиясининг журналистлари ва журналистика талабалари иштирок этишди. Тадбир дастурига диний масалалар, радикаллашув ва терроризм, ёшлар психологияси бўйича етакчи экспертлар, шунингдек ҳуқуқ-тартибот органлари ва ННТ вакиллари иштирокида давра суҳбати киритилди.
Ёшлар билан радикаллаштириш ва зўравон экстремизмнинг олдини олиш ишларида давлат ҳуқуқ-тартибот органлари ва фуқаролик жамияти институтларининг роли; бағрикенглик ва динлараро мулоқот ғояларини илгари суришда ОАВнинг роли; гендер жиҳатлари, ОАВда низоли-сезгир мавзуларни, диний бағрикенглик масалаларини ёритишда этик меъёрлар; динларга нисбатан оммавий ахборот воситаларидаги стереотиплар ва нотўғри тасаввурлар каби барча учун долзарб масалалар муҳокама қилинди. Барча масалалар бўйича жуда фаол мунозаралар бўлиб ўтди, талабалар экспертларга ўзларини қизиқтирган масала ва муаммолар бўйича кўплаб саволлар беришди.
Тадбирнинг иккинчи қисми ўқув характерига эга бўлиб, иштирокчилар учун ЖҚТМ тренерлари назарий таркибий қисм ва амалий кўникмалар билан мастер-класслар ўтказдилар. Хусусан, ксенофобия, радикаллашув ва экстремизмга олиб келадиган динлараро ва миллатлараро зиддиятлар ва низоларга қарши курашиш масалалари бўйича тренерларнинг тақдимотлари ва кейслар билан ишлаш, медиадан қандай фойдаланиш бўйича машғулотлар ўтказилди.
Бошқа сессия динлараро муросасизлик ва камситишни қўзғатувчи фейкларга қарши курашиш кўникмалари, ахборот хавфсизлигининг муҳим масалаларига бағишланди. Медиа амалиётидан олинган кейслар шарҳи инсон ҳуқуқлари контекстида нафрат тили ва адоват, камситиш масалаларига бағишланди. Ўзбекистон Бадиий академияси эксперти Ф.Абижанованинг «Санъат мактаблари ўқувчилари ва академия талабаларининг ижодида тинчлик ва бағрикенглик ғоялари» мавзусидаги маърузаси барча учун қизиқарли ва янги бўлди.
Тадбирнинг барча босқичлари жадал ва интерактив шаклда ўтказилди, шунинг учун иштирокчилар учун қизиқарли ва мазмунли бўлди. Эҳтимол, тадбирнинг энг фаол мусобақа қисми беш гуруҳ талабалар учун ўтказилган «Динлар тарихини биласизми?» мавзусидаги 20 та саволдан иборат квиз-викторина бўлди. Битта гуруҳ ғолиб бўлди ва унинг барча аъзолари мукофот сифатида «power bank»лар олишди.
Шу билан бирга, тадбир доирасида яна бир муҳим иш қисми бўлди – журналистика талабалари билан биргаликда биринчи марта талаба-рассомлар учун танлов ўтказилди. Улар «Ёшлар нигоҳида бағрикенглик» танловига ўз ишларини тақдим этишди. Уларнинг расмлари тадбир ўтказиладиган залда намойиш этилди ва ҳар бир иштирокчи уларни кўриб чиқиши ва ўзаро муҳокама қилиши мумкин эди.
Энг яхши ишларнинг 3 та ғолиби ва рағбатлантирувчи мукофотлар учун 3 та ғолибни аниқлаш учун аноним овоз бериш ўтказилди. Овоз беришдан сўнг, танлов ғолиби бўлган ёш рассомлар кейинги ижодлари учун фойдали бўладиган мукофотлар олишди.
Барча иштирокчилар тадбир якунида бундай тадбирларни келажакда ҳам ўтказиш кераклигини, чунки ижодкор ёшлар ўз ҳаётида ўз вақтида тўғри йўналишлар, зарур билимларни олиши ва жамиятдаги салбий стереотиплар ёки диний радикалларнинг бузғунчи тарғиботи таъсирига тушиб қолмаслиги кераклигини таъкидлашди.