Ҳар уч қарордан бири жамоатчиликдан яширилган: “E-qaror”да очиқликка оид қонун қандай бузилмоқда?
Сўнгги беш йилда Ўзбекистонда қабул қилинган минглаб давлат қарорлари жамоатчиликдан яширилган ҳолда қабул қилинган. Коррупцияга қарши курашиш агентлиги бошқарма бошлиғи Қаҳрамон Ниёзхўжаевнинг қайд этишича, 2021–2025 йилларда “E-qaror” электрон тизимига киритилган 24 417 та ҳужжатнинг 9 006 таси (37 фоизи) ёпиб қўйилган. Бу фақат маҳаллий ҳокимият органлари қарор ва фармойишларининг ўрганишлари натижаси бўлиб, бошқа ижро органлари ҳужжатлари бу рақамларга киритилмаган.
Эътиборлиси, яширилган қарорларнинг 1 911 таси давлат маблағларини ажратиш билан боғлиқ. Яъни бюджет пулларининг қаерга ва қандай йўналтирилгани ҳақида жамоатчилик ахборот олиш имконидан маҳрум этилган.
Ўрганиш даврида энг кўп яширилган қарорлар Тошкент шаҳри, Хоразм, Сирдарё, Самарқанд каби ҳудудлар ҳиссасига тўғри келиши аниқланган.
Қонунчиликка кўра, ижро ҳокимияти органлари томонидан қабул қилинадиган қарорларни “E-qaror” орқали очиқ эълон қилиш давлат органлари фаолиятида очиқликни таъминлашнинг асосий шартларидан бири ҳисобланади. Уларни асоссиз равишда яшириш эса қонун бузилиши сифатида баҳоланади ва мансабдор шахсларни жавобгарликка тортишга асос бўлади.
Бироқ амалиётда бу талаблар тўлиқ бажарилмаган.
Мутахассислар фикрича, “E-qaror” тизимида очиқликни таъминлашнинг заифлиги коррупция хавфларини кучайтириши мумкин. Шу боис Агентлик томонидан яширилган қарорларни эълон қилиш ва қонун бузилишларига йўл қўйган мансабдорларга нисбатан таъсирчан чоралар кўриш амалиёти кучайтирилади. Бугун Коррупцияга қарши курашиш агентлигида ўтган Президентнинг «Ўзбекистон Республикасида коррупциянинг олдини олиш ва унга қарши курашиш тизимини янада такомиллаштириш тўғрисида»ги фармони мазмунига бағишланган амалий мулоқотда берилган тушунтиришга кўра энди агентлик амалдорлар ёпган ҳужжатларини бевосита кузатиб бориш имконига эга бўлди. Бундан буён раҳбарлар асоссиз яширган қарорлари учун агентлик баённомасига кўра маъмурий жавобгарликка тортилади.
Манбаа: uzdiplomat.uz